Artan Behrami, Këshilltar i Shefit të Shtetit, ka thënë se lideri i Vetëvendosjes, Albin Kurti po dështon të ruajë standardet që i ka vendosur kur ishte në opozitë. Ka thënë se Shefi i Qeverisë së sotme po ballafaqohet me pasojat kur Albin Kurti rrinte në tenda dhe gjuante me gaz lotsjellës.

“Iluzionet e krijuara në dy dekadat e fundit për funksionimin e shtetit, iu kthyen Albin Kurtit kokëposhtë në dy javët e para të qeverisjes. Ai transversalen e moralit e ka ngritur shumë lart, duke e bërë të paarritshme edhe për gjenialitetin hyjnor të proklamuar nga vetë përkrahësit e tij”, ka shkruar Behrami, në një reagim në Fb.

“Retorika e Kurtit për zgjidhjen e problemeve me efekt të hajmalisë shumë shpejt pritet t’i shndërrohet në mallkim, duke mos arritur të ofrojë zgjidhje magjike për sfidat që ka shteti dhe shoqëria jonë. Kurti i sotëm i Hotel Sharrit do të ballafaqohet në qeverisje me pasojat e veprimeve të Kurtit të tendave dhe gazit lotsjellës si opozitar”, ka shtuar ai.